ಹೈಕು

ಸೃಷ್ಟಿಯಲಿರುವುದೆಲ್ಲವೂ
ಸೊಟ್ಟ
ಉದಾಹರಣೆ

ಮಂಗಳ ಗ್ರಹ

ಸಂಜೆ ಪಡುವಣದಿ
ಮತ್ತದೇ
ಮಂಗಳಗ್ರಹ

ದಶಕಗಳ  ಹಿಂದೆ
ಗ್ರಂಥಾಲಯದಾಚೆ
ಮೂಲೆಯಲಿ ಕುಳಿತು
ಗೆಳತಿಗೆಹೇಳಿದ್ದ ನೆನಪು

"ನಾವೆಲ್ಲಿದ್ದರೇನು
ನೆನಪಾದಾಗ
ಮಂಗಳ ನೋಡಿ ಮಾತಾಡು
ನಾನೂ ಹಾಗೆ
ಮಾಡುವೆ"

ಗೆಳತಿ ನನ ನೆನೆದಿರಬೇಕಿಂದು,
ಮಂಗಳನ ನೋಡುತ್ತ
ಆ ಹಳೇ ತಾಜಾ ಮಾತು
ನೆನಪಾಯಿತು

ಮಂಗಳಗ್ರಹ ನೋಡುತ
ಹೇಳಿದೆ
"ನಾನಿನ್ನ ಇಂದಿಗೂ ಪ್ರೀತಿಸುವೆ ಗೆಳತಿ
ನಾನಾರೋಗ್ಯ
ನೀನಾರೋಗ್ಯವೇ ?"
ಜೊತೆಗೊಂದು ಮುಗುಳ್ನಗು
ಅವಳದನು ಕಂಡಾಗ
ನೆನಪಾಗಲೆಂದು

ಒಮ್ಮೆ ಮಕ್ಕಾಳಾಟವೆನಿಸುವುದು
ಆದರೂ
ಏನೋ ತೃಪ್ತಿ ಭಾವ
-ದೀಪಕ್

ಒಂಟಿತನ

ಒಂಟಿತನವೇನೆಂದು
ಕೇಳದಿರು ನನ್ನನ್ನು
ಕಳೆದಿರುವೆ ದಶಕವನು
ಒಂಟಿ ಸಲಗದಂತೆ
ಕಟ್ಟೆಯ ಅಶ್ವತ್ಥದಂತೆ

ಒಂಟಿಯಾಗಿ 
ಪೂರಾ ಮಾಡಿದ್ದೆಲ್ಲ
ಅರ್ಧ
ಅಲ್ಲಿರಲಿಲ್ಲ
ನೋಡು ನಿನ್ನರ್ಧ

ಅದಕ್ಕೆ
ಹೆಜ್ಜೆಜ್ಜೆಗೂ ಮೂದಲಿಕೆ
ಸಂಶಯ
ಎಲ್ಲದಿಕ್ಕುಗಳಲು
ನಿನ್ನ ಶೋಧ
ಜೊತೆಗೆನ್ನ ಕ್ರೋಧ

ಬದ್ಧ

I
ಹಲವಾರು ಬಾರಿ

ಮನೆತೊರೆದಿದ್ದೇನೆ,

ಮನ ಕೇಳದೆ

ಹಿಂತಿರುಗಿದ್ದೇನೆ?

ನಾನಲ್ಲ ರಾಜ,

ನನಗಿರಲಿಲ್ಲ

ಮಡದಿ ಪುತ್ರ ರಾಜ್ಯ

ಅರ್ಜಿತಾಲರ್ಜಿ ಆಸ್ತಿ

ಆದರೂ

ಹರಿಯಲಾಗದ

ವ್ಯಾಮೋಹ

ಮಾತೃ ಬಂಧ

ನಾ ಕೇವಲ

ಸಂಸಾರಕ್ಕೆ ಬದ್ಧ

ಹಗಲು ರಾತ್ರಿಯ ಕಾಯ್ದು

ರಾತ್ರಿ ಹಗಲನು ಕಾಯ್ದು

ಮೌನದ ಕಫನ್ ಸೇರಲು

ಸಿದ್ಧ

ಅದಕ್ಕೆ

ಅದಕ್ಕೇ

ನಾನಗಲಿಲ್ಲ ಬುದ್ಧ

-ದೀಪಕ್

ಮೋಡ

ಮೋಡಗಳ ಹಿಂದೆ
ಓಡುತಿದ್ದವನ ಹಿಡಿದು
ಅಂಗಿ ತೊಡಿಸುತಿದ್ದಳು
ಮೋಡ ಅಳುತ್ತಿತ್ತು...

ಕನಸು

ಬದುಕಿನಲ್ಲಿ ಕನಸುಗಳು
ಕಳೆದುಹೋಗುತ್ತಿವೆ
ಯಾರಾದರೂ
ಹುಡುಕಿ ಕೊಡಿ

ಸೇವೆಯಾಕಾಂಕ್ಷೆಯನು
ಸಮಾಜ
ಕೊಲ್ಲುತ್ತಿದೆ
ಯಾರಾದರೂ
ದಾರಿಕೊಡಿ

ಅಜ್ಞಾನ
ಸಾಕ್ಷರರಲಿ
ಮೆರೆದು
ಕುಣಿದು
ಕುಪ್ಪಳಿಸುತಿದೆ
ಯಾರಾದರೂ
ಬೆಳಕು ಕೊಡಿ

ಪ್ರೀತಿ ಪ್ರೇಮ ಗಳಿಂದು
ಮಾರುಕಟ್ಟೆ ಸರಕಾಗಿವೆ
ಯಾರಾದರೂ ಅದನ್ನು
ಬಿಡಿಸಿಕೊಡಿ

ಆದರ್ಶತೆ ಇಂದು
ಬೆನ್ನ ಮೂಳೆ
ಮುರಿದುಕೊಂಡಿದೆ
ಯಾರಾದರೂ ಅದಕೆ
ಚಿಕಿತ್ಸೆ ಕೊಡಿ

ನನ್ನ ನಾಳಿನ ಕಂದ
ಕನಸು ಸೇವೆ
ಜ್ಞಾನ
ಪ್ರೀತಿ ಪ್ರೇಮ
ಆದರ್ಶಗಳನ್ನು
ತಪ್ಪು ತಿಳಿಯಬಾರದು

ಕನಸುಗಳು
ಕಳೆದು ಹೋಗಿವೆ
ಯಾರಾದರೂ
ಹುಡುಕಿ ಕೊಡಿ

ಮರೆಯಬೇಕಿದೆ

ಮರೆಯಬೇಕಿದೆ
ನೆನಪುಗಳನೆಲ್ಲ
ಅಳಿಸಿಹಾಕಿ
ದಿನ
ಬೆಳಗು
ರಾತ್ರಿ
ವಾರ
ತಿಥಿಗಳನು
ನೆನಪಿಗೆ ಬಾರದಂತೆ.

ಪ್ರೀತಿ ಸ್ಫುರಿಸಿದ್ದ
ಗಳೆಯ
ಗೆಳತಿ
ಪ್ರೇಮಿ
ಅಪ್ಪ ಅಮ್ಮ ಅಕ್ಕ ಅಣ್ಣ ತಮ್ಮ ತಂಗಿಯರ ನೆನಪುಗಳನು

ಬೆನ್ನ ಹಿಂದೆ ಚೂರಿ
ಹಾಕಿದವರ
ಮರೆಯಬೇಕಿದೆ
ನೇರ ನುಡಿಯಲು ಬಾರದ
ಭಿಕಾರಿ ಸಮಾಜವ
ಬದಲಿಸಬೇಕಿದೆ