ಬದುಕೇ

ಬದುಕೇ 

ನೀನೆಂತಹ ಮರೀಚಿಕೆ!

ಇಹುದನ್ನು ಕಸಿದು,

ನೆನಪಾಗಿಸಿ

 ಕಣ್ಣ ಅಂಚಿನಲಿ ಜಿನುಗಿಸಿ,

ಮತ್ತೆ ಆವಿಯಾಗಿಸುವ

 ಮಾಯಾವಿ

ಏನು ನಿನ್ನುದ್ದೇಶ,

ನೀಡಿದಷ್ಟೇ 

ಅರ್ಥವ ಪಡೆಯುವ 

ನೀನು ಯಾರು?

ಕರೊನ

ಕೊರೊನ ಬಾ ಒಮ್ಮೆ ಅಪ್ಪಿಬಿಡು

ನಡೆದುಬಿಡಲಿ ಯುದ್ಧ ನನ್ನ ನಿನ್ನ ನಡುವೆ

ಸೋತು ಮಣ್ಣಾಗುವೆ

ಯಾ ಗೆದ್ದು ನಾ ಬೀಗುವೆ

ಸಾಕು ನಿನ್ನ ಹೆಸರಿನಲ್ಲಿ ಅಂಜಿ ದೂಡುವ  ದಿನಗಳು 

ನಿತ್ಯ sanitization ಗೋಳು

 ಸಾಲದೆಂಬಂತೆ ಸಹಕರಿಸದ ಪತ್ನಿಯಳಲು

ಮೈಮೇಲೆ ಹೇರಿಕೊಳ್ಳುವ PPE ಬೆವರು

ಚರ್ಮರೋಗಗಳ ಸಂಭವೀಯ ಭೀತಿ

ಸಾಕು ಮಾಡು ನಿನ್ನ ಭಯದ ಜೀವನ

ಬಾ ಒಮ್ಮೆ ಅಪ್ಪಿಬಿಡು

 

ಯಾಕ ಮುನಿಸು ಮಗಳ

ಹಿಡಿ ತಗ ತಿನಿಸು ಹಾಲು ಪಗಳ

ನಿಟ್ಟುಸಿರ ಬಿಡಬ್ಯಾಡ ತಿನ್ನು ಅಗಳ

ನೀ ಮಾಡಬ್ಯಾಡ ಜಗಳ

ಕಿರಿಕಿರಿ ಬೇಡವೆಂಬ ರಗಳ

ನಕ್ಕು ಸೂಸು ನೀ ಹರುಷದ ಪರಿಮಳ

ದವಸಧಾನ್ಯ

ಆಡಿಗೆ ಮಾಡುವಾಗ

ನಿನ್ನ ನೆನಪು

ಸಮಯದೊಂದಿಗೆ ಅಮ್ಮ ಮಕ್ಕಳು ಒಂದು ದಿಕ್ಕಾಗುತ್ತಾರೆ ಅಪ್ಪ ಅತ್ತಿತ್ತಗುಲದೆ ಸರಳ ರೇಖೆಯಾಗಿ ಉಳಿದುಬಿಡುತ್ತಾನೆ

ಯುದ್ಧ

ನಿರ್ಬಂಧಿತ ದಿನ

ಎಲ್ಲೆಡೆ ಹನನ

ಗಡಿಯಲ್ಲಿ 20 ಜನ ಸತ್ತರು

ನಾಡಲ್ಲಿ ಒಂದೆದಿನಕೆ 200

ರೋಗದ ಭೀತಿ ಯುದ್ಧದ ನೀತಿ

ಇನ್ನೊಬ್ಬರದು ಕಸಿದು ತಿನ್ನುವರೀತಿ

ಪುಟದ ತುಂಬೆಲ್ಲ ವೀರ ದೇಶಭಕ್ತರು

ಏನಾಯಿತಲ್ಲಿ ತುಂಬಿಹ ದೊನ್ನೆ ಭಕ್ತರು

ಎಡ ದೇಶಕ್ಕೆ ಶಸ್ತ್ರ ಚಿಕಿತ್ಸೆ 

ಬೆರೆದೇಶಕ್ಕೆ ಎಡೆಯ ಚಿಕಿತ್ಸೆ 

ಪ್ರಕ್ಷುಬ್ಧ ಮನಗಳ ಮಾರಾಮಾರಿ

ನಮ್ಮದ ಕೊಳ್ಳಿರಿ ನಿಮ್ಮದ ಬಿಸಾಡಿರಿ

ಅತಿರೇಖಗಳ ಖಿನ್ನ ಚಿತ್ರಣ

ಜಂಗಮವಾಣಿಯ ಮಾಯೆಯು ನೋಡಿ

ಬೀಸುವ ಗಾಳಿ ಸುರಿವ ಮಳೆಯೊಳು

ತೇಲುತಿದೆ ನೋಡಿ ಪ್ರೀತಿಯ ಘಮಲು

ನಾನು ನೀನೆಂಬ ಇಬ್ಬಗೆ ತೊರೆದು

ಎಲ್ಲವೂ ಸಮವೆಂಬ ಸಂದೇಶವ ಪೊರೆದು

ಕವಿತೆಯೆಂದರೆ

ಕವಿತೆಯೆಂದರೆ

ಗೆಳೆಯರ ನೆನಪನ್ನು ಆಟೋಗ್ರಾಫಿನಲ್ಲಿ ಸೆರೆ ಹಿಡಿದು ನೆನೆದು

 ಅದರ ಪುಟಗಳ ತಿರುವುವುದು

 ಹೃದಯದಲಿ ಅವರಸಿರಾಗುವುದು

ಕವಿತೆಯೆಂದರೆ

ಮೊದಲ ಪುಟದಲ್ಲೊಂದು ಉದ್ದನೆ ಗೆರೆ

ಮೂಡುವುದು ಕಲೆಯ ನೆನಪ ಬರೆ

ಕವಿತೆಯೆಂದರೆ

 ಒಲುಮೆಯ ಗೆಳೆಯರ ಹೂ ಪಕಳೆ

ಅದರಲಿನ್ನೂ ನೆನಪಾಗಿ ಅಗಲಿದವಳಕಳೆ

ಕವಿತೆಯೆಂದರೆ

ಪುಟ ಪುಟದಲ್ಲೂ ಒಲುಮೆಯ ಗೆಳತಿ

 ನನಗವಳ ನೆನಪು ತುಸು ಅತಿ

ಕವಿತೆಯೆಂದರೆ

ಭೂಷಣನ ನೆನಪು 

ಮನಸಿಗೆ ಇಂಪು

ಸೂಸುತಿಹುದು ನಂಬುಗೆಯ ಕಂಪು

ಕವಿತೆಯೆಂದರೆ

ಮುಂದಿಹನೆನ್ನ ತುಂಟ ಗೆಳೆಯ

ಬರೆದಿರುವನೆನ್ನ ಶ್ರಮ ಜೀವನದೆಳೆಯ

ಕವಿತೆಯೆಂದರೆ

ನೀ ವಿಚಿತ್ರ ವಾಚಾಳಿ 

ಇಹುದು ತಲೆ ತಿನ್ನುವ ಚಾಳಿ

 ರಸ ಶಾಸ್ತ್ರ ನಿನಗೆ ಪ್ರಿಯ

ಆದರೂ ನಿನಗಿಹುದು ಪ್ರೀತಿಸುವ ಹೃದಯ

ಕವಿತೆಯೆಂದರೆ

ತಾಳ್ಮೆ ಕಳೆದು ಕೊಳ್ಳಬೇಡ ಎನ್ನುವ ಅಪರಂಜಿ

ನೀಡುತಿಹಳು ಬರಹ ಪರಿಹಾರ ನನಗಂಜಿ

ಕವಿತೆಯೆಂದರೆ

ಬಿಡದು ಯಾರನಂಟು

ಎಲ್ಲ ಗೆಳೆಯರ ಬರಹದ ಗಂಟು

ಕವಿತೆಯೆಂದರೆ

ಪುಟ ಪುಟ ತೆರೆದಂತೆ ಉಕ್ಕುವ ಪ್ರೀತಿ

ಹಾಲು ಕಾದು ಉಕ್ಕುವ ರೀತಿ

ದೀಪಕ್