ಹೇಳೇ ಗೆಳತಿ

ಹೇಳೇ ಗೆಳತಿ
ಮೈಲುಗಳಾಚೆಯಿಂದ
ಹೇಗೆ ಕದ್ದೆ
ಅರಿವಿನ
ಅರಿವೆಯನು

ಹೇಳೇ ಗೆಳತಿ
ನಾಜೂಕು ಕಣ್ಣುಗಳಂದವನಡಗಿಸುವ
ಚೌಕಟ್ಟ ಹಿಂದೆ
ನೀ ಹೇಗೆ ಕುಳಿತಿರುವೆ
ಮುನಿಸೇ, ಹಸಿವೆಯೆ
ದುಗುಡವೇ ನಾಚಿಕೆಯೆ
ಜಗದಂಜಿಕೆಯೆ?

ಹೀಗೆ ಬಾ , ನನ್ನೊಂದಿಗೆ ಕೂರು
ಹಸಿವೆಯೆ ಹಣ್ಣು ತಿನ್ನು
ಬೇಡವೇ ಹಾಲು ಕುಡಿ
ಬೇಸರವೆ ಅತ್ತುಬಿಡೆನ್ನೆದೆಗೆ
ಮುಖವಿತ್ತು
ಅವಿಯಾಗಲಿ ಎಲ್ಲ ದುಗುಡ ದುಮ್ಮಾನ

ಈ ದೊಡ್ಡ ನಗುವಿನ ಹಿಂದಿರುವ
ಮೂಕ ರೋಧನ ಮುಚ್ಚಿಡಲಾರೆ ನೀ ನನ್ನಿಂದ
ಅದಕೆ ಇರಬೇಕು
ಎಲ್ಲಾ ಅನ್ನುವರು
ನೀ ಭಾವ ಜೀವಿ
ನಿನ್ನ ಭಾವುಕತೆಯನಿಲ್ಲಿ ಹೇಳು
ಉತ್ತರಾವಿರದಿದ್ದರೂ
ನನ್ನ ಪ್ರೀತಿಯಾಸರೆಯಿದೆ ನಿನಗೆ ಯೋಚಿಸ ಬೇಡ
*ದೀಪಕ್*