ಯುದ್ಧ

ಯುದ್ಧ ಯಾರಿಗೆ ಬೇಕು
ಹೊಲದಲ್ಲಿ ದುಡಿವ ರೈತನಿಗೆ?
ಕೂಲಿ ಮಾಡುವ ಕಾರ್ಮಿಕನಿಗೆ?
ಮನೆಮನೆ ಅಲೆಯುವ ಮಾರಾಟಗಾರನಿಗೆ?
ಶಾಲೆಗೆ ಹೋಗುವ ಕಂದನಿಗೆ?
ಸಾಲಿನಲ್ಲಿ ಚಿಕೆತ್ಸೆಗೆ ಕಾಯ್ದಿಹ ರೋಗಿಗೆ
ಚಿಕಿತ್ಸೆ ನೀಡುವ ವೈದ್ಯನಿಗೆ?
ಕಟ್ಟಡಕೂಲಿ ಕಾರ್ಮಿಕನಿಗೆ?
ಕಾರಕೂನನಿಗೆ?
ಸೇತುವೆ ಸೇತುವೆ ಗಳ ಯೋಜನೆ ಸಿದ್ಧಪಡಿಸುವ ಇಂಜಿನಿಯರ್ ಗಳ  ಸಂಸ್ಥೆಗಳಿಗೆ?
ಗಡಿಕಾಯುವ ಯೋಧರಿಗೆ ?

ಯಾರಿಗೆ ಬೇಕು ಯುದ್ಧ
ಫುಡಾರಿಗಳನು ಹೊರತುಪಡಿಸಿ
ಧರ್ಮಾಂಧರನು ಹೊರತುಪಡಿಸಿ
ವಿವೇಚನಾರಹಿತರನ್ನು ಹೊರತುಪಡಿಸಿ ಇನ್ನಾರಿಗೆ ಬೇಕಿದೆ ಯುದ್ಧ?

ಆಟ ಊಟ

ಹೆಚ್ಚೇನು ಬೇಡದ ಕೂಸು
ನಾಲ್ಕು ಚಮಚೆ ಅನ್ನ
ಜೊತೆಗಾಡಲು ಸೊಳ್ಳೆ ಬ್ಯಾಟು
ಬಣ್ಣದ ಕಾಗದ
ಸಣ್ಣ ಚೆಂಡು
ಮೊನ್ನೆ ಅಮೆಝೋನ್ ನಿಂದ ಪ್ಯಾಕಲ್ಲಿ ಬಂದ ಸ್ಪಂಜಿನ ತುಣುಕು
ಆರತಿಯ ತಟ್ಟೆ
ಅಲ್ಲಲ್ಲೇ ಬಿದ್ದಿರುವ ಹಳೆ ಇನ್ವಿಟೇಶನ್ ಕಾರ್ಡು
ಸಮಾರಂಭದಲ್ಲಿ ಉಡುಗೊರೆಯಾಗಿ ಬಂದ ಟೆಡ್ಡಿ
ಹಳೆ ಪಾತ್ರೆ ,
ಆಭರಣದ ಪರ್ಸು,
Atm ಕಾರ್ಡು,
ಮಾತ್ರೆಯ ಸಣ್ಣ ಕವರ್ರು,
ಉಂಗುರದ ಡಬ್ಬ,
ಟಿವಿ ರಿಮೋಟ್,
ಊಟದ ಡಬ್ಬಿಯ ಮುಚ್ಚಳ ,
ಪ್ರತಿಯೊಂದನ್ನು
ಸರದಿಯಲ್ಲಿ ಕಣ್ಣಮುಂದೆ ಹಿಡಿದು
ಒಂದು ಗುಟುಕ ನಿನ್ನ ಗಂಟಲಲ್ಲಿ ಇಳಿಸುವಳು

ಹಸಿದರೆ ಉಂಡಾಳು ಬಿಡು  ಎನುವ ನನಗೆ
ಕೂಸಿಗದೆಲ್ಲ ತಿಳಿದೀತೆ
ಎಂದು ಗದರುತ್ತಾ
ಬರದ ಹಾಡ ಗುನುಗುತ್ತ ಕಾರ್ಡಬೋರ್ಡ್ ಡಬ್ಬದಲ್ಲಿ ಸದ್ದು ಮಾಡುತ್ತಾ
ಗಾಳಿಬೀಸುತ್ತ
ಮತ್ತೆ  ಗಮನವ ತಪ್ಪಿಸಲು ನನ್ನ ಚಾಲೀಸಿನ ಮತ್ತೊಂದು ಬತ್ತಳಿಕೆ
ಅವಳೆಂದು ಓದದ ವಾರ ಪತ್ರಿಕೆ
ಹೀಗೆ ಊಟದ ಪಯಣ
ಅದರೊಂದಿಗೆ ನಿನ್ನ ಆಟ

ಗುಲಾಬಿ

ಗುಲಾಬಿ ಮಾದಕತೆಯವಳೇ
ಹೇಳಿಬಿಡು
ಎಲ್ಲಿಹುದು ನಿನ್ನ ಮುಳ್ಳುಗಳು?

ಕಳೆದ ದಿನಗಳ ನಶೆಯಲಿ
ನಿನ ನೆನೆಯುತ್ತಿದೆ ಈ ಹೃದಯ
ಹೇಳಿಬಿಡು ನಿನ್ನ ನೆನಪುಗಳ ಸರಕನೆಲ್ಲಿಳಿಸಲಿ?
ಆ ಭ್ರಮೆಯ ದಿನಗಳನು
ಈ ಹೃದಯ
ನೆನೆನೆನೆದು ಬಳಲಿದೆ
ದೀಪಕ್

ಗಾಡಿ

ನೋಡಿರಿ ಇದುವೇ ನನ್ನಯ ಗಾಡಿ
ಇದರಲ್ಲಿ ಕುಳಿತು ಹೋಗುವುದೊಂದು ಮೋಡಿ
ನನ್ನಾನಂದ ಹರಿದಿದೆ ಕೋಡಿ
ಎತ್ತಿಕೊಳ್ಳುವ ಜಂಝಾಟವಿಲ್ಲ ನೋಡಿ
ಇಹುದು ಎರಡು ಚಕ್ರಗಳ ಜೋಡಿ
ತಳ್ಳಲು ಮುಂದಕ್ಕೆ ಹೋಗುವುದು ಬಂಡಿ
ಒಳಗೆ ಕೂರಲು ನಲಿವೆನು ಆಡಿ
ಅಮ್ಮಅಪ್ಪ ಅರಿತಿಹರು ನನ್ನೆದೆಬಡಿತ ನಾಡಿ

ನಿತ್ಯ

ಹಕ್ಕಿಗಳ ಸದ್ದಿಗೆ
ಸಡ್ಡು ಹೊಡೆದು
ಕಂಬಳಿಯ
ಮುಖದಮೇಲೆಳೆದು
ಕತ್ತಲ ಮಾಡಿ ಮಲಗಿದಾಗ
ಏನೋ ಸಾಧಿಸಿದ ಸುಖ
ಎದ್ದು ಸಾಧಿಸಲು ರಾಶಿ ಇರುವಾಗ!

ಎದ್ದಾಗ ಸಾಧಿಸಲು ತಲೆ ಉಪಯೋಗಿಸಬೇಕು
ಕಷ್ಟಬೀಳಬೇಕು
ಯಾಕವೆಲ್ಲ ಉಸಬಾರಿ ?

ನೆತ್ತಿ ಮೇಲೇರಿದಾಗ
ತಡವೆಂದು ತಡಬಡಾಯಿಸಿ
ಗಬಗಬ ತಿನ್ನುತ್ತಾ
ತೆಗಿದಾಗ
ರಾತ್ರಿ ತಿಂದ ಪನ್ನೀರ ವಾಸನೆ
ಹೊಟ್ಟೆಯಲ್ಲಿ ಝುಳು ಝುಳು!

ಕೆಲಸಕ್ಕೆ ಬಂದೊಡನೆ  ಗೋಣಗಾಟವಿಲ್ಲದೆ
ಕಾಯ್ದ ಕೆಲಸಗಳನ್ನು ಮುಗಿಸಿ
ರಾತ್ರಿಯ ಬಣ್ಣಕೆ ತಯಾರಿ
ಮತ್ತೆ ಆಕಡೆ ಓಣಿಯತ್ತ ದೌಡು

ಎರಡು ಚಣ
ಅತ್ತು ನಕ್ಕು
ಜೋಗುಳ ಹಾಡಿ
ಹಿಂತಿರುಗುವ ಹೊತ್ತಿಗೆ
ಎಲ್ಲ ನೀರವ, ಮೌನ

ಮನದಲಿ ಹೆಪ್ಪುಗಟ್ಟಿದ ದಿನವನು
ರಾತ್ರಿ ಚಮಚೆಯ ಹಿಡಿದು
ಐಸ್ ಕ್ರೀಮ್ ನಂತೆ ಮೆಲ್ಲುತ್ತಾ
ಮೆತ್ತ ಅಪ್ಪುಗೆಯಲ್ಲಿ
ವಕ್ರವಾಗಿ ತಲೆಯನ್ನು ತೂರಿಸಿ
ಮತ್ತಷ್ಟು ಈಡೇರದ ಕನಸುಗಳ ಕಾಣುವ ದುಸ್ಸಾಹಾಸ...
ದೀಪಕ್

ಕೃಷ್ಣ

ಶಿರದಿ ಕಿರೀಟ ನವಿಲುಗರಿ,
ಹೂ ಮಾಲೆ ತೊಳ್ಬಂದಿ,
ಬೆತ್ತಲೆದೆ ಬಾಸುರಿ
ನಿನ್ನ ಕೃಷ್ಣ ಮಾಡದು

ನಿನ್ನ ಯೋಚನೆ ಯೋಜನೆಗಳು ಯೋಜನ ಯೋಜನವಾಗಲಿ
ಮೀರು ನೀ ಕೃಷ್ಣ ಸಾಧನೆ
ಬೆಳೆದಮೇಲೆ ನಿನಗಿಹುದು ಕೃಷ್ಣಲೆಕ್ಕದ ಕಾಟ
ಸುತ್ತ ದುರುಳರ ಕೂಟ
ನೀ ಕಂಡೂ ಕಾಣದಂತಿರಬೇಕು
ಜನರು ಮಾಡುವ ಮಾಟ
ಹಸಿದು ಉಂಡಂತಿರಬೇಕು,
ಉಂಡವಗೆ ಹಸಿದವನೆಂದು ಮತ್ತೆ ನೀಡುತ್ತಿರಬೇಕು,
ಕೃಷ್ಣನಿಗಿರಲಿಲ್ಲ ಈ ಕಷ್ಟ ಕೊಟಲೆಗಳು
ನಗುಮೊಗದ ದ್ರೋಹಿಗಳು
ಗೋಸುಂಬೆ ಗೋಪಿಕೆಯರು
ನೀ ಕೃಷ್ಣನ ಮೀರಿ ಬೆಳೆಕಂದ

ನೆನಪುಗಳು

ಇನ್ನು ಯೋಚಿಸುತ್ತಿರುವೆ,
ಸಮಯ ಹೇಗೆ ಉರುಳಿತೆಂದು?
ಬಾಲ್ಯದ ಸಮಯ
ನೆನಪ ಬುಟ್ಟಿಯನೆಂದು
ಸೇರಿತೆಂದು?

ನನಾಗಿನ್ನೂ ನೆನಪಿದೆ ಜೊತೆಗಲೆದ ಸಮಯ,
ಬಾಳೆಹಣ್ಣು, ಪಾನಿಪುರಿ, ಐಸ್ ಕ್ರೀಮ್,
ಕಳೆದ ರೂಪಾಯಿ...  

ನೆನ್ನೆ ಮೊನ್ನೆಯವರೆಗೂ ನೀ
ಈ ಊರಿನಿಂದಾವೂರಿಗೆ
ಸುತ್ತುತ್ತಿದ್ದ ನೆನಪು,
ಮಾತಿನಲ್ಲಿ ಕೊಚ್ಚಿಹೋದ ರಾತ್ರಿಗಳ ನೆನಪು,
ಜೊತೆಗೆ ನೋಡಿದಾ ಪರದೇಶ
ಅರೆ ಮತ್ತೆ ನೋಡಬೇಕೇನುವ ಹೊತ್ತಿಗೆ
ನೀನೇ ಪರದೇಶದಲ್ಲಿ!
ನೆನಪುಗಳು, ನೆನಪುಗಳು
ಬರೀ ನೆನಪುಗಳು
ಕಣ್ಣ ತುಂಬಿ ಒಸರುವ ನೀರಿನಂತೆ
ಎಲ್ಲಿಹೋಯಿತಾ ಸುಂದರ ಚಣಗಳು?