ನೆನಪು

ಮತ್ತೆ ಮತ್ತೆ ನಿನದೆ ನೆನಪು
ಕೊರೆವ ಕೊರಗು ತಲೆಯೊಳಿಹುದು
ಮಮತೆಗಂಜಿ ದೂರ ಸರಿದೆ,
ನಾನು ಇಲ್ಲಿ ಹಲುಬುತಿಹೆನು
ಬೇರೆಪಾಡು ಇಲ್ಲ ನೋಡು
ಎಲ್ಲ ನಿನ್ನ ನೆನಪು ನೋವು
ಆದರೂ ಕಾಯುತಿಹೆನು
...ದನಿಗೆ ಸಿಗದ ಉತ್ತರ

ಚುಟುಕ

ಕಳೆದು ಕೊಂಡದ್ದು
ಕಳೆದು ಕೊಳ್ಳುತ್ತಿರುವುದು
ಕಳೆದು ಕೊಳ್ಳಬೇಕಿರುವುದು
ಕಳೆಯಂತೆ ಕಳೆಯಿಂದ
ಕಳಕಳಿಸುತ್ತಿದೆ

ವರ್ತುಲ

ವರ್ತುಲಗಳ ನೋಡುತ
ಅದ ಸುತ್ತಿಕೊಂಡು ಸುಖಿಸುತ್ತ
ವರ್ತುಲಗಳ ಗಾಳಿಯಲಿ ಹಾರಿಸುತ
ಇದುವೇ ಜೀವ , ಇದೆ ಜೀವನ
ಎಂಬ ವ್ರತ್ತದ ವ್ರತಮಾಡಿದರೆ
ವ್ರತ್ತದಾಚೆ ಎಂದುಬರುವೆ?
ಬರುವ ತವಕ ಯಾರಿಗಿಲ್ಲ
ಹೊರಗೆ ಎಲ್ಲ ಸಿಗುವುದಿಲ್ಲ
ಉಸಿರು ಕಟ್ಟುವುದೆನಗೆ ಇಲ್ಲಿ

ತೋರು ಬೆರಳು ಹಿಡಿದು ಬಾರ
ನಿನಗೆ ಜಗ ತೋರುವೆ

ಮುದುಡಿ ಅಂಜಿ ದೂರ ಸರಿದು
ಅಂತರ್ಮುಖಿಯೀಕಾಗುವೆ?
ಜೊತೆಗೆ ಇರುವೆ ಅಷ್ಟೆ ಸಾಕು
ಕವಚ ನೀನೆ ಒಡೆಯಬೇಕು
ಅದರ ಒಡೆಯನಲ್ಲ ನಾನು
ಅದು ನಿನ್ನ ಕವಚವೋ