ಸುಮ್ಮನಿದ್ದು ಬಿಡೆ ಹುಡುಗಿ
ಚಂದಿರನೊಡನೆ
ಚಕ್ಕಂದವಾಡುವ ಸಾಗರನೇಕೆ ನಿನಗೆ ಬೇಕು?
ಅವನು ನಿನಗೂ ಇರುವುದು ಬರೀ ಕಣ್ಣೀರಉಪ್ಪಿನ ಋಣ ,
ನಿನ್ನ ಋತು ಚಕ್ರ ಚಂದಮನೊಡಗೂಡಿ ಚಕ್ಕಂದವಾಡುವುದೇ!
ಹುಣ್ಣಿಮೆಯ ಅಲೆಗಳಲಿ
ಬಯಕೆಗಳ
ನೊರೆ ಏಳಿಸಿ ಚಕ್ಕಂದವಾಡುವನು
ಮತ್ತೆರಡುವಾರದಲಿ ರಕ್ತದೋಕುಳಿಯಲಿ
ಗುಳ್ಳೆಗಳನೊಡೆವನು
ಚಂದಮ ಸಾಗರರ ಚಕ್ಕಂದದಲಿ
ಜಪ್ಪಿಸಿ ಅಪ್ಪಿದೊಡೆ
ಬಯಕೆಫಲ ಹುಡುಗಿ
ಯೋಚಿಸು ನಿನಗೇನು ಬೇಕೆಂದು
-ದೀಪಕ್
ಏನನ್ನೋ ಯಾರನ್ನೋ
ನೆನೆದನಗೆ
ಬರೆಯಲಾಗದಿನಿಯ
ಉತ್ಕಟಕ್ಕರೆಯ
ಭಾವಗಳು
ಅಕ್ಕರ ರೂಪ
ಪಡೆದಾಗ
ಕವನವಾಗುವುದೋ
ಗೆಳೆಯ
ನದಿ ಮೂಲ
ಋಷಿ ಮೂಲ
ಕವನದಾ ಮೂಲವನಾ
ಬೊಮ್ಮನೇ ಬಲ್ಲ
ಪಿಡಿದು ಬರೆದು
ನುಡಿವುದಷ್ಟೇ
ಎನ್ ಕಾಯಕ
ಇದಕೆ ಸಂಶಯಬೇಡ
ಸುರರಈಶ
ಪದಗಳ ಗಾಳದಿ
ಭಾವದ ಶ್ರುತಿಗೆ
ಹಿಡಿದು ದುಡಿಸಬೇಕು
ತಿದಿಯನು ಒತ್ತಿ
ತಿದ್ದಿ ತೀಡಿ
ರೂಪು ನೀಡಬೇಕು
ಎಲ್ಲೋ ಮೀಟಿ
ಏನೋ ತಾಗಿ
ಹಳೆಯ
ಮಧುರ ನೆನಪು
ಹೃದಯದ ಮಿಡಿತ
ಏರಿದ ಬಡಿತ
ಜೀವಕೆ
ವಿಲಿವಿಲಿ ನುಲಿತ
ನೆನಪುಗಳೇ
ನಿನಗಿದೋ
ಅಶ್ರು ತರ್ಪಣ
ಆಗದು ನಿಮ್ಮೊಂದಿಗೆ
ಕಾವ್ಯ ಸಿಂಚನ
-ದೀಪಕ್
ವಿದ್ಯೆ ವಿನಯ ಕಲಿಸುವುದಂತೆ
ಆದರೆ
ನಾ ನೋಡಿದ್ದು
ದೇಶ ತೊರೆವುದನ್ನಷ್ಟೇ
***
ವಿದ್ಯೆ ಸಹನೆ ಕಲಿಸುವುದಂತೆ
ಆದರೆ ಕಲಿತವರಲಿ
ಒಣ ಪ್ರತಿಷ್ಠೆ
ಅಸಹನೆ ಮತ್ಸರ...
***
ಹೆಣ್ಣುಕರುಣಾಮೃತ
ನಾದಿನಿ ಅತ್ತೆಯರಿಗೆ
ಬರೀ ಬಾಯಿಮಾತ
***
ಸದ್ದೇ ಮಾಡುತಿಲ್ಲ
ನಿನ್ನ ರಥ ಚಕ್ರ ಪಾಂಚಜನ್ಯ
ಮುರಿಯಲಾಗುತಿಲ್ಲವೇ
ಶ್ರುತಕೀರ್ತಿಗಿತ್ತ ವರ
ಹೋಯಿತೆಲ್ಲಿ
ನಿನ್ನ ಯದಾ ಯದಾ
ನಾವೆಲ್ಲ
ಬೇಡುತಿಹೆವು
ದಯ ದಯ
ಭೋರ್ಗರೆವ ಸದ್ದು ಹೊರಗೆ
ನೆನಪ ಕಲರವ ಒಳಗೆ
ದೂರದಲ್ಲಿ ಕೇಳುತಿತ್ತು
ನಾನಿನಗೆ ಜೋಡಿ ಅಲ್ಲವೇನು
ಪಾತಾಳ ಗರಡಿಹಿಡಿದು
ಕತ್ತಲಲಿ ಕೆಳಗಿಳಿದು
ದೊರೆಯದ್ದರ ಶೋಧ
ಅಂತರಾಳದೊಳೆಲ್ಲೂ
ಕೇಳಲಿಲ್ಲ
ನಿನ್ನಹೃದಯ ಬಡಿತ
ಇಲ್ಲಿ ಬರೀ ವ್ಯರ್ಥ ತುಡಿತ
ಕಟ್ಟಡಮೇಲೇರಿದಷ್ಟು
ಆಳ ಪಾಯ
ನಮಬಂಧಕಪಾಯ
ಕಿಡಕಿ ಗಾಳಿ ಉಲ್ಲಾಸ
ನನಗೆ
ಒಳಗೆ ಬಿರು ಸೆಖೆ ನಿನಗೆ
ನಿನಗೇನು ಗೊತ್ತು
ನೀ ಕೇಳಬಹುದು
ಕಣ ಕಣಕೆ ಚಣ ಚಣವೂ
ಉಣ ಬಡಿಸುವಾಹ್ಲಾದ ?
ಅನಿಸುತ್ತದೆ
ನಾಬೆಳೆವುದೂ ಬೇಡ
ನೀ ಆಳಕಿಳಿವುದೂ ಬೇಡ
ನಾ ಕುಬ್ಜನಾಗಿದ್ದುಬಿಡುವೆ
ಹುಡುಗಿ
ದಿನಗಳುರುಳುತ್ತಿವೆ
ಅಗಮನಕೆ
ದಿನಗಳೆಣಿಕೆ
ನಡೆಯುತ್ತಿದೆ
ಬಲಿಯಾಗದ ಸಮಯ
ಬದುಕಿಗರ್ಥ ಕಾಣುವ ಪರಿ
ನಡುವೆ
ಹೊಯ್ದಾಡುತ್ತಿದೆ ಜೀವನ
ಸಮಯವೇ ಚಿಂತೆ
ಉರುಳದೆಂದು
ಬೇಸತ್ತಿದೆ
ನಿತ್ಯ ಜಪಮಾಡು
ಮನದಲಿ
ಬೇಗಬಾರೆಂದು
ಬೇಗೆ ತೀರೆಂದು
ನೀನೇ ನನ್ನಯ ಬಿಂಬ
ಬೆರಿನ್ನೇನಿಲ್ಲ
ಹುಟ್ಟದಾನಿನ್ನಿಂದ
ನಿರೀಕ್ಷಿಸಲೇನಿದೆ ಕಂದ
ಹುಟ್ಟಿಬಾ
ನಗುತ ಬಾ
ಊನರಹಿತವಾಗಿ ಬಾ
ಮನಗಳು
ಜಿಡ್ಡುಹಿಡಿಯುತಿವೆ
ಅದ ನೀ ಬೆಸೆ ಬಾ
ಸಾಮಾಜಿಕ ತೊಡರ
ನೀಗಿಸುವ
ಮುಗ್ಧ ನಗೆಯ
ಬೀರುಬಾ
ಆರಾಗಿಹರನೇಳು
ಮಾಡುಬಾ
ಸದ್ದೇ ಮಾಡುತಿಲ್ಲ
ನಿನ್ನ ರಥ ಚಕ್ರ ಪಾಂಚಜನ್ಯ,
ಮುರಿಯಲಾಗುತಿಲ್ಲವೇ
ಶ್ರುತಕೀರ್ತಿಗಿತ್ತ ವರ?
ಹೋಯಿತೆಲ್ಲಿ
ನಿನ್ನ ಯದಾ ಯದಾ ,
ನಾವೆಲ್ಲ
ಬೇಡುತಿಹೆವು
ದಯ ದಯ
ಹೊತ್ತಿದೆ ಕಿಡಿ,
ಕಾಪಿಡು
ಗಾಳಿನೀಡು
ಬಿರುಗಾಳಿಯ ತಡೆ
ಉರುವಲ ನೀಡು
ಉಸಿರುಗಟ್ಟಿಸದೆ
ಹೊಗೆ ಕೆಮ್ಮು
ಬರದಂತೆ
ಆತುರ ಬೇಡ,
ತಾಳ್ಮೆ ಕಾಳಜಿಯೆ
ಗೆಲುವಿ ಸೂತ್ರ
ಮುನ್ನುಗ್ಗಿ ನಡೆನೀ,
ಜಾತಿ ಕುಲಗಳ ಮೀರಿ
ಮಂದಿರ ಮಸೀದಿಗಳನು
ಮರೆತು
ಹಿರಿಯ ಕಿರಿಯರೆನ್ನದೆ
ಮೇಲು ಕೀಳೆಂದೆನ್ನದೆ
ಅಂಧಾಕಾರವನೆಲ್ಲ
ತೊಡೆದು
ನಾವೆಲ್ಲರೊಂದೆ
ಎಂದರಿವಿನೆಡೆಗೆ
ದೀಪಕ್
🙏🏿
ಕುರುಬನೊಬ್ಬ ಬೇಕು
ಮೆಂದೆ ಚದುರಿ ಹೋಗದಂತೆ
ಬ್ಯಾ ಬ್ಯಾ ರಾಗ ಹೊರಡಿಸುವಂತೆ
ದೊಡ್ಡಿಹಾದಿಯ ತೋರಲು
ಕುರುಬನೊಬ್ಬ ಬೇಕು
ತುಪ್ಪಳ ಅತಿಯಾಗದಂತೆ
ನೆರೆಯ ನೆಲವನು ಮೇಯದಂತೆ
ಚುಟುಕು ಹುಲ್ಲನು ಮೆಯಿಸುತ್ತ
ಹುಲಿಯ ಬಾಯಿಗೆ
ಬೀಳದಂತೆ ಕಾಯಲು,
ದೊಡ್ಡಿಗೂ ಹುಲ್ಲು ಹೊರುವಂತ
ಕುರುಬನೊಬ್ಬ ಬೇಕು
ಈ ಸಾಹಿತ್ಯ ಪಯಣಕೆ
ಕುರುಬನೊಬ್ಬ ಬೇಕು
ನೋವೆಂದು ಕುಳಿತಾರೆ
ಯಾರೀಗೆ ಸುಖ ಉ಼ಂಟೊ
ನೋವಾ ಕಂಡವರೇ
ಜಗವೆಲ್ಲ
ನೋವ ಕಂಡವರೇ
ಜಗವೆಲ್ಲಾ ಇದ್ದಾರು
ನೋವೆಂದು
ಹಲುಬುವರ್ಯಾರಿಲ್ಲ
ನೋವೆಂದು ಹಲುಬುತಾ
ಜೀವಾಬಿಟ್ಟವರಿಲ್ಲ
ಜೀವ ಬಿಟ್ಟವನು ಹಲುಬಿಲ್ಲ
ಜೀವಾ ಬಿಟ್ಟವನು ಹಲುಬಿಲ್ಲ
ಶಿವನಾಣೆ
ನೋವ ಸುಖವಾನವನೆಂದು
ಉಂಡಿಲ್ಲ
ನೋವಾ ದುಃಖವನುಂಡೂ
ಸುಖದಾ ನಿದ್ರೆಯಕಂಡು
ಬಂದಾ ಬದುಕೇ
ಜಯಬದುಕು
ಬಂಧ ಬದುಕೇ
ಜಯಬದುಕು
ಶಿವನಾಣೆ
ಹಲುಬುವಾ ಬದುಕು
ಏನ್ ಬದುಕೊ
-ದೀಪಕ್
ಮನದೊಳಿದ್ದುದನು ಸುರಿದಳು
ತಾಪ ಆವಿಯಾಯಿತು ಮರುಗಿ ಮತ್ತೂ ಸೃವಿಸಿದಳು
ನದಿಯಾಗಿ ಹರಿದಳು
ಅವ ಅಷ್ಟೇ ವೇಗಾವಾಗಿ ಹೀರಿಕೊಳ್ಳುತ್ತಲೇ ಹೋದ ಅಂದಿನಿಂದಿಂದಿನವರೆಗೂ ಅವರ ಆಟವಿನ್ನೂ ಮುಗಿದಿಲ್ಲ.
ನನಗೊಂದು ಹೆಸರಿಡು ಗೆಳೆಯ ಸ್ನೇಹಿತ ಮಗ ಅಪ್ಪ ಇನಿಯ ಮಾಮ ಕಾಕ?
ನೀ ಹೀಗೇ ಸುಂದರ ಹುಡುಗಿ
ಹೆಸರು ಕೆಡಿಸುವುದು ನಿನ್ನಂದವ
ಆಕೆ ಬಿಡಲಿಲ್ಲ
ಹೆಸರಿಡೆಂದು ಭೋರ್ಗರೆದಳು
ರಚ್ಚೆಹಿಡಿದಳು
ಸೋನೆಯಾದಳು
ಇವ ಉತ್ತು ಬಿತ್ತಿ
ಬೆಳೆಯುತ್ತ ಹೋದ
ದಣಿದು ವಿಶ್ರಮಿಸಿದಳು
ಇವ ಕಡಿದು ಸುಗ್ಗಿ ಮಾಡಿದ
ಹೆಸರಿಲ್ಲವೆಂಬುದ ನೆನೆದು ಕುದ್ದಳು
ಬೆವರಹನಿಗಳಾದವು
ತುಂತುರು
ರಚ್ಚೆಹಿಡಿವಳೆಂದಿವನು
ನೊಗ ಕಟ್ಟಿ ಸಜ್ಜಾದ
ಮುನಿಸಿಕೊಂಡವಳು
ಹಿಂತಿರುಗಿದಳು
***
ಬರುವಳೆಂದು ಕಾಯ್ದ
ಕಾದು ಬೆಂಡಾದ
ಕೊರಗಿದ
ಮರುಗಿದ
ನರಳಿದ
ಕಂಗಾಲಾದ
ಬಾರೆಂದು
ಬೇಡಿದ
ಕಾಡಿದ
ಹೆಸರಿಡುವೆನೆಂದ
ಪೂಜಿಸುವೆನೆಂದ
ಸ್ತುತಿಸುವೆನೆಂದ
ಹೆಸರಿಡಬೇಕೆಂದಳು
ನಿತ್ಯ ನಮಿಸೆಂದಳು
ಭಜಿಸಬೇಕೆಂದಳು
ಭುಜಿಸಬೇಕೆಂದಳು
ಪೂಜಿಸಬೇಕೆಂದಳು
ಇವನೆಲ್ಲವನೊಪ್ಪಿದ
ಅವಳಡಿಯಾಳಾದ
**
ಯುಗ ಯುಗಗಳಾದರು
ಇನ್ನೂ ಮುಗಿದಿಲ್ಲ
ಇವರ ಚಕ್ಕಂದ
ಇವನವಳ ಕಂದ
ಇವರ ಜೋಡಿ
ಬಲು ಚಂದ
-ದೀಪಕ್
ಇವರು ದೊಡ್ಡವರು
ಬೆಳೆದಪ್ರೌಢರು
ಡೊಂಕಕೀಯ್ವ ಬೆಲೆ
ಸುಂಕಕಿಲ್ಲ
ಸಿಹಿರೋಗಿಗು ಬೇಕು
ಪಾಕದಲಿದ್ದಿಹ ಕಬ್ಬು
ಮೆಂತೆಹಾಗಲಗಳಿವರಿಗೆ ಗಬ್ಬು
ಏಣಿ ಹಿಡಿವವಬೇಕು
ಮೇಲಕೇರೆ
ಹೇಳದಿರುವವ ಬೇಕು!
ಎಚ್ಚರಿಸುವವ ಬೇಕು
ಎಬ್ಬಿಸದಂತಿರಬೇಕೆಬ್ಬಿಸಿ
ಸೆರೆ ಬೇಕು
ಸೆರಗು ಬೇಕು
ಬೆಳಗದುಸುಕಲಿರಬೇಕು
ತಳ್ಳುತ ದೂರ ದೂರ
ನೀಸನಿಹವಿರೆಂದು ದೂರ
ಹೇಳಿದುದ ಮರೆಯದೆಬಾರ
ಮರೆತೇಕಿದೆಂದು ದೂರ
ನಂಬದಿರೆ ಹೊಣೆಯಾರ
ಅಲ್ಲುಳಿವುದು ಬರೀ ತಕರಾರ
ಒಡಗೂಡುವುದು ಕಹಿನಾರು
ಮನಸು ದೂರ ದೂರ
ಸಂಬಂಧಗಳಾರುವುವು ದೂರ
ಮತ್ತೆ ದೂರದೂರ ಎಂಬ ದೂರ
ದೂರದಾಚೆಗಿನ ಬದುಕ ಸುಂದರ
ತೊರೆನೀ ದೂರ
ನೋಡು ಬಾರ
ನೀ ಒಲವತೋರ
ಹಾದಿಯಲಿ ತೂಕಡಿಸುತ
ನೆನಪುಗಳು ಸಾಲು ಸಾಲು,
ಮಧುರ ಕಾಡುವ ನೆನಪುಗಳು
ದೂರ ಜಾರಿದಷ್ಟು
ಮುತ್ತುವ ನೆನಪುಗಳು
ನಗು, ಮೈಮಾಟ,ಸನಿಹ, ಅಪ್ಪುಗೆ, ಸಂಗ, ಮಾತುಗಳು ಯಾವುದು ಕಾಡುವುದೋ?
ನೆನಪುಗಳು ಕಾಡುತಾವೇ
ನೀನಿಲ್ಲ
ಇದ್ದಿದ್ದರೆ ಸಾಧ್ಯವಾಗುತ್ತಿತ್ತೇನೋ
ನೆನಪ ಭ್ರಮೆ ಹರಿದು ನೈಜವಾಗಿ
ಬದುಕಲು
ದೀಪಕ್
ಕೆದಕದಿರೆನ್ನಭಾವಗಳ
ಹುದುಗಿಹ ಪ್ರೇಮವ
ಹೆಳವನಾಗಿಹೆನು
ಕನ್ನಡಿಯ ಗಂಟೆಂದು
ಗಂಟಲದುಮಿಹೆನು
ಮಿಸುಕಿಸದಿರು
ನಾ ಅತ್ತು ಬಿಟ್ಟೇನು
ಯೋಚಿಸಬೇಕಿತ್ತೆ
ನಾ ಉಸಿರುವಮುನ್ನ,
ಬೇರುಗಳ ಸಡಿಲಿಸಿ
ಬೇರುಬಿಡಬೇಕಿದೆ,
ಕನಸಿನರಾಜ್ಯದೊಳು
ವ್ಯಾಜ್ಯಗಲಿಲ್ಲ ನೋಡು
ನಿನ್ನೊಳೊಂದಾದೆ
ಪದ ಗಾಳದಿ,
ಕತ್ತಲಿನಾಳದ ಬೇರುಗಳು
ನಮ್ಮುಸಿರ ಹೀರಲು
ನಿನ್ನಸಿರನುಳಿಸಿದೆ;
ಇನ್ನೇನು ನೀಡಲಾಗಲಿಲ್ಲ
ನೀಗುವಮುನ್ನ,
ಕ್ಷಮೆಯಿರಲಿ
ಜೊತೆಗೆರಡು ಕೊಡಲಿ
ಕಡಿಯಬೇಕು
ಕಡಿದು ಬದುಕಬೇಕು
ನವಿರುಭವಾಗಳ
ನೆತ್ತರಿನಿಂದ
ಕಾಪಿಡಬೇಕು
ಬದುಕು ದೋಂಬರಾಟ
-ದೀಪಕ್
ಮರದ ಕೆಳಗೆ ತಾನು ಕೂತು
ಕೊಳಲ ಮೇಲೆ ಬೆರಳನಿಟ್ಟು
ತುಟಿಯನೊತ್ತಿ ಉಸಿರುಕೊಟ್ಟು
ಸುಧೆಯ ಹರಿಸುತಿದ್ದನು
ನೀರಿಗಾಗಿ ಬಂದ ರಾಧೆ
ಮನದಪೂರ ಅವನ ಬಾಧೆ
ನೀರಮರೆತು
ಗಾನದಲ್ಲೇ ಮಿಂದು ನೆನೆದು ಎದ್ದಳು
ಮುರುಳಿಗಾನ ಮೋಹನಾಂಗ
ಭಾವಬಿರಿದು ಹಾಡುತಿರಲು
ನರ್ತಿಸುವರ
ಗೆಜ್ಜೆಹೆಜ್ಜೆಗೆ
ಇಳೆಯು ಪುಳಕಗೊಂಡಿತು
ತುಂಬು ಕಳೆಯ
ಹಾಸು ಹೊದ್ದು ಮಲಗಿರಲು
ಲತೆಯತುಂಬ ಮಲ್ಲೆ ಘಮಲು
ಊರತುಂಬಿ ಹರಡಿರಲು
ಚೋರನಿವನು
ಎದೆಯಭಾವ ಹರಿ ಹರಿದು
ರಾಗ ಹೊಮ್ಮಿಸುತಿದ್ದನು
ಮೈಮರೆತ ಭೂಮಿತಾಯಒಡಲು
ಕಣ್ಣುಮುಚ್ಚಿ
ನಾದಪುಳಕದಿ
ತಾಳಹಾಕುತಿದ್ದಿತು
ಕೊಳಲ ನಾದ
ಆಹಾ ಸ್ವಾದ
ಕೇಳಲಿಂಪು
ನಿರ್ವಿವಾದ
ಕಣ್ಣ ಮುಚ್ಚಿ ಕರಣ ಬಿಚ್ಚೆ
ಮೈಮನ ರೋಮಾಂಚನ
ನದಿಯ ಹಾಗೆ
ಸ್ವರವು ಹರಿಯೆ
ಸ್ವಾದಿಸುವರು
ಆಲಿಸುವರು
ಭುಜಿಸಿ ಭಜಿಸಿ
ನೃತ್ಯಿಸುವರು
ಕೇಳಲಿವನ
ಮುರಳಿನಾದ
ಬದುಕು ಪುಳಕ
ಎನುವರು
-ದೀಪಕ್
ಕೊಳಲ ಮೊರೆತ
ಏನೋ ಸೆಳೆತ
ಕೇಳುತೆಲ್ಲ ಸ್ಥಂಭೀಭೂತ
ನಾದ ಹೊಮ್ಮುತಿರಲು
ಹೊರಗೆ
ಧುಮುಕುತಿತ್ತು
ಕೇಳ್ವ ಕಿವಿಗೆ
ಬೆರಳ ವರಸೆ
ನಾದವನ್ನು
ಏರುಪೇರು ಮಾಡಲು
ಎದೆಯ ಭಾವ ಹೊರಗೆ ಹರಿದು
ಕೊಳಲಿನೊಡಲ ತುಂಬುತಿರಲು
ಬೆರಳನಾಟ್ಯ ಭಾವಲಾಸ್ಯ
ಕಣ್ಣುಮನವ ತುಂಬಿತು
-ದೀಪಕ್
ಕಡೆವಕೋಲ ದೂರತಳ್ಳಿ
ಮೊಸರ ಗಡಿಗೆ ಹಿಂದೆ ಬಿದ್ದು
ಸಿಕ್ಕ ಬೆಣ್ಣೆಯನ್ನು ಮೆದ್ದು
ಕೊಳಲ ನುಡಿಸುತಿದ್ದನು
ಕೊಳಲ ನುಡಿಸೆ
ಮನವ ತಣಿಸೆ
ಕುಡಿದಂತೆ
ಹಾಲು ಬೊಗಸೆ
ನೆರೆದರು ಸೊಗಸ ಕೇಳಲು
ಮೇಯುತಿದ್ದ ತರುಗಳೆಲ್ಲ
ಆಲಿಸುತ್ತ ನಿಂತವು
ನೀರತರಲು ಹೊರಟ ನೀರೆ
ದನಿಯ ಕೇಳಿ ಸನಿಹ ಬಾರೆ
ಮುದ್ದು ಕಂದನನ್ನು ಕಂಡು
ಜಗವ ಮರೆತು ಬಿಟ್ಟಳು
-ದೀಪಕ್
ನಸುಕಲ್ಲಿ ಹರಿದಾ ನಿದ್ರೆ
ವಿಷಯಗಳ ಚಿಂತಿಸುತ ಬಿದ್ದೆ
ಪ್ರೀತೀಯ ಅರ್ಥವನುಡುಕುತ ತಡವರಿಸುತ್ತಿದ್ದೆ
ಗೆಳತಿ ಉಸಿರಿದಳು
ಪ್ರೀತಿ ಮನದ
ಪ್ರತಿಮೆ ಕಣೋ ,
ಪದ ಪದಾರ್ಥವ
ಮೀರಿದ ಭಾವ...
ಪಡೆಯಲೇನೂ
ಇಲ್ಲಾ ಇದರಲಿ;
ಕೊಡುತ
ನಲಿಯುವುದನ್ನ ಕಲಿ;
ತಪ್ಪ ಕ್ಷಮಿಸುವ
ಭಾವವೆ ಪ್ರೀತಿ,
ತಪ್ಪ ಒಪ್ಪುವುದದರಲೊಂದು
ನಿತಿ ,
ಸಿಟ್ಟು ಸೆಡವುಗಳನು ಮೀರಿ ಬದುಕನು
ಮುಂತಳ್ಳುವುದೇ
ಪ್ರೀತಿ,
ಮಹಾತ್ಯಾಗ ಮೂರ್ತಿ ಕಣೋ
ಕೊಟ್ಟಷ್ಟು ಅರ್ಥಗಳ
ಪಡೆವುದದೊಂದೆ
ನಮ್ಮ ಮಿತಿಯ
ಮೀರುವುದದೊಂದೆ
ನಿದ್ರೆಭಂಗವಾಗಿ ಎದ್ದವಗೆ
ಬರಲಿಲ್ಲ ಮತ್ತೆ ನಿದ್ರೆ
ಇನ್ನೆಷ್ಟು ದಿನ
ಹೆರಿಗೆಯಾಗದ
ಭಾವಗಳ
ಹೊತ್ತು ತಿರುಗುವೆ?
ಕೇಳು,
ಸಣ್ಣ ನೋವು ಗಳಿಗೂ
ಅತ್ತು ಬಿಡಬೇಕು
ಕಣ್ಣೀರಿಗೇನು
ಗೊತ್ತುಭಾವಾಭಾವ?
ಅದುದರಿದರೆ ಮೂಡುವುದು
ತೃಪ್ತಿಭಾವ
ಕಂಡ ಕನಸುಗಳನೊತ್ತೆಷ್ಟು
ತಿರುಗುವೆ ಹೇಳೆ?
ಸ್ವಲ್ಪ ಬಯಕೆ
ಸ್ವಾರ್ಥಗಳ
ಮೈಗೂಡಿಸಿಕೊ
ಎಲ್ಲ ತೊರೆದ
ಸಂತರಲ್ಲ ನಾವು
ನಮಗಿಂತ ಮುಖ್ಯ
ಬೇರಾವುದೂ ಇಲ್ಲ
ಬೇರೆಯದಲಕ್ಷಿಸುವುದೂ
ಬೇಕಾಗಿಲ್ಲ
ಕೆಲ ಹನಿಗಳನುಳಿಸಿಕೊ
ಹಸಿಯಾಗದಿರೆ
ಒಡಲಿಗೆ ಬೇಕಾದೀತು
ಒಮ್ಮೆ ಅತ್ತು ಬಿಡಬಾರದೇ
-ದೀಪಕ್
ಏಕಾಂತದೊಂದಿಗೆ ಮೌನವಾಗಿ
ಸಂಭಾಷಿಸುತ್ತಿರುತ್ತೇನೆ...
ಏನೀ ಜೀವನ
ಏನಿದರುದ್ದೇಶ
ನನ್ನಿರುವಿಕೆಯರ್ಥವೇನು
,,,,,,,,,,ಯಾರಾದರೂ ಬಂದು
ಯೋಚನಾ ಲಹರಿಯನು
ಮುರಿಯುತ್ತಾರೆ
,,,,
ಮತ್ತೆ ಏಕಾಂತ , ಯೋಚನೆಗಳು
ಏನೀ ಸಂಬಂಧಗಳು
ಯಾತಕೀ ಇಹ ಬಂಧುಗಳು
ಉತ್ತರ ಸಿಗದೆ
ಪುಸ್ತಕ ಅನುಭವಗಳ ಮೊರೆ
ಹೋಗುತ್ತೇನೆ ...
ಮತ್ತೆ ಏಕಾಂತ
ಬೆಂಬಿಡದ ಭೂತ
ಅದರೊಂದಿಗೆ
ಮುಂದುವರಿಯುವ ಬದುಕು
ಯೋಚನೆಗಳ ಸಾಲು ಸಾಲು
-ದೀಪಕ್
ಹೀಗೇಕೆ
ನಿನ್ನ ಮಾತುಗಳು
ನನ್ನ ಕಿವಿಗೆ ಬರೀ ಸಡ್ಡು
***
ಅತಿಯಾಗಿ ಪ್ರೀತಿಸುವುದರ ಮೊದಲ ಲಕ್ಷಣ ಗೋಳುಹೊಯ್ದುಕೊಳ್ಳುವುದು
ಉದಾ ನಾನು ನೀನು
***
ಏನು ಮಾತನಾಡುವೆನೆಂದೆನಗೆ ತಿಳಿಯದು ,
ಕಾರಣ ನಿನ್ನ ನೋವ ನಲಿವಾಗಿಸಬಲ್ಲೆಎಂಬ ವಿಶ್ವಾಸ
***
ನಿಸ್ತಂತುದನಿಗೆ ನೀ ಸಿಗದ ದಿನ ಪಾಪ;
ನಿನ್ನ ಸಿಗಿವಷ್ಟು ಕೋಪ
ನಿತ್ಯ ಮಜ್ಜನ
ಶುಭ್ರಉಡುಪುಟ್ಟು
ದೇವರ ಮನೆಗೆ ಹೋಗಿ
ಗಣೇಶ ಲಿಂಗ ಬಸವರ
ನೀರೊಳದ್ದಿ
ಬಟ್ಟೆಯಲಿ ಒರೆಸಿ
ಮಂಟಪದಲಿ ಜೋಡಿಸುತ
ಸತ್ಯಂ ಮಾತಾ ಗೊಣಗು
ದೀಪಕೆಣ್ಣೆಯ ಸುರಿದು
ಕೆರೆದೊಂದುಕಡ್ಡಿಯಲೆರಡೂ
ದೀಪವ ಹಚ್ಚಿ
ಮೂರು ಗಂಧದಕಡ್ಡಿಗಳಿಗೆ
ಬೆಂಕಿ ತಾಗಿಸಿ
ಕುಂಕುಮ
ಹೂವು
ವಿಭೂತಿ
ಗಂಧ
ಗಂಟೆಯ ಸದ್ದು
ಪೂರ್ಣಮಾದಾ
ಪೂರ್ಣಮಿದಂ
ಪಠಣ
ಕರ್ಪೂರದಾರತಿ
ಧೂಪದೊಗೆಗಳ ನಡುವೆ ಕುಳಿತು
ಕಣ್ಮುಚ್ಚಿ
ಉರು ಹೊಡೆದ
ವಕೃತುಂಡ ಮಹಾಕಾಯ
ಓಂ ಭೂರ್ ಭುವಸ್ವಃ
ಬದುಕ ಕ್ರಿಯೆ
ನಿರಾಕಾರಕಾಕಾರವನೀಡಿ
ಪ್ರತಿಷ್ಠಾಪಿಸಿ
ಭುಜಿಸಿ ಭಸ್ಮ ಮಾಡುವುದು
ಸಂಜೆ ಪಡುವಣದಿ
ಮತ್ತದೇ
ಮಂಗಳಗ್ರಹ
ದಶಕಗಳ ಹಿಂದೆ
ಗ್ರಂಥಾಲಯದಾಚೆ
ಮೂಲೆಯಲಿ ಕುಳಿತು
ಗೆಳತಿಗೆಹೇಳಿದ್ದ ನೆನಪು
"ನಾವೆಲ್ಲಿದ್ದರೇನು
ನೆನಪಾದಾಗ
ಮಂಗಳ ನೋಡಿ ಮಾತಾಡು
ನಾನೂ ಹಾಗೆ
ಮಾಡುವೆ"
ಗೆಳತಿ ನನ ನೆನೆದಿರಬೇಕಿಂದು,
ಮಂಗಳನ ನೋಡುತ್ತ
ಆ ಹಳೇ ತಾಜಾ ಮಾತು
ನೆನಪಾಯಿತು
ಮಂಗಳಗ್ರಹ ನೋಡುತ
ಹೇಳಿದೆ
"ನಾನಿನ್ನ ಇಂದಿಗೂ ಪ್ರೀತಿಸುವೆ ಗೆಳತಿ
ನಾನಾರೋಗ್ಯ
ನೀನಾರೋಗ್ಯವೇ ?"
ಜೊತೆಗೊಂದು ಮುಗುಳ್ನಗು
ಅವಳದನು ಕಂಡಾಗ
ನೆನಪಾಗಲೆಂದು
ಒಮ್ಮೆ ಮಕ್ಕಾಳಾಟವೆನಿಸುವುದು
ಆದರೂ
ಏನೋ ತೃಪ್ತಿ ಭಾವ
-ದೀಪಕ್
ಒಂಟಿತನವೇನೆಂದು
ಕೇಳದಿರು ನನ್ನನ್ನು
ಕಳೆದಿರುವೆ ದಶಕವನು
ಒಂಟಿ ಸಲಗದಂತೆ
ಕಟ್ಟೆಯ ಅಶ್ವತ್ಥದಂತೆ
ಒಂಟಿಯಾಗಿ
ಪೂರಾ ಮಾಡಿದ್ದೆಲ್ಲ
ಅರ್ಧ
ಅಲ್ಲಿರಲಿಲ್ಲ
ನೋಡು ನಿನ್ನರ್ಧ
ಅದಕ್ಕೆ
ಹೆಜ್ಜೆಜ್ಜೆಗೂ ಮೂದಲಿಕೆ
ಸಂಶಯ
ಎಲ್ಲದಿಕ್ಕುಗಳಲು
ನಿನ್ನ ಶೋಧ
ಜೊತೆಗೆನ್ನ ಕ್ರೋಧ
I
ಹಲವಾರು ಬಾರಿ
ಮನೆತೊರೆದಿದ್ದೇನೆ,
ಮನ ಕೇಳದೆ
ಹಿಂತಿರುಗಿದ್ದೇನೆ?
ನಾನಲ್ಲ ರಾಜ,
ನನಗಿರಲಿಲ್ಲ
ಮಡದಿ ಪುತ್ರ ರಾಜ್ಯ
ಅರ್ಜಿತಾಲರ್ಜಿ ಆಸ್ತಿ
ಆದರೂ
ಹರಿಯಲಾಗದ
ವ್ಯಾಮೋಹ
ಮಾತೃ ಬಂಧ
ನಾ ಕೇವಲ
ಸಂಸಾರಕ್ಕೆ ಬದ್ಧ
ಹಗಲು ರಾತ್ರಿಯ ಕಾಯ್ದು
ರಾತ್ರಿ ಹಗಲನು ಕಾಯ್ದು
ಮೌನದ ಕಫನ್ ಸೇರಲು
ಸಿದ್ಧ
ಅದಕ್ಕೆ
ಅದಕ್ಕೇ
ನಾನಗಲಿಲ್ಲ ಬುದ್ಧ
-ದೀಪಕ್
ಬದುಕಿನಲ್ಲಿ ಕನಸುಗಳು
ಕಳೆದುಹೋಗುತ್ತಿವೆ
ಯಾರಾದರೂ
ಹುಡುಕಿ ಕೊಡಿ
ಸೇವೆಯಾಕಾಂಕ್ಷೆಯನು
ಸಮಾಜ
ಕೊಲ್ಲುತ್ತಿದೆ
ಯಾರಾದರೂ
ದಾರಿಕೊಡಿ
ಅಜ್ಞಾನ
ಸಾಕ್ಷರರಲಿ
ಮೆರೆದು
ಕುಣಿದು
ಕುಪ್ಪಳಿಸುತಿದೆ
ಯಾರಾದರೂ
ಬೆಳಕು ಕೊಡಿ
ಪ್ರೀತಿ ಪ್ರೇಮ ಗಳಿಂದು
ಮಾರುಕಟ್ಟೆ ಸರಕಾಗಿವೆ
ಯಾರಾದರೂ ಅದನ್ನು
ಬಿಡಿಸಿಕೊಡಿ
ಆದರ್ಶತೆ ಇಂದು
ಬೆನ್ನ ಮೂಳೆ
ಮುರಿದುಕೊಂಡಿದೆ
ಯಾರಾದರೂ ಅದಕೆ
ಚಿಕಿತ್ಸೆ ಕೊಡಿ
ನನ್ನ ನಾಳಿನ ಕಂದ
ಕನಸು ಸೇವೆ
ಜ್ಞಾನ
ಪ್ರೀತಿ ಪ್ರೇಮ
ಆದರ್ಶಗಳನ್ನು
ತಪ್ಪು ತಿಳಿಯಬಾರದು
ಕನಸುಗಳು
ಕಳೆದು ಹೋಗಿವೆ
ಯಾರಾದರೂ
ಹುಡುಕಿ ಕೊಡಿ
ಮರೆಯಬೇಕಿದೆ
ನೆನಪುಗಳನೆಲ್ಲ
ಅಳಿಸಿಹಾಕಿ
ದಿನ
ಬೆಳಗು
ರಾತ್ರಿ
ವಾರ
ತಿಥಿಗಳನು
ನೆನಪಿಗೆ ಬಾರದಂತೆ.
ಪ್ರೀತಿ ಸ್ಫುರಿಸಿದ್ದ
ಗಳೆಯ
ಗೆಳತಿ
ಪ್ರೇಮಿ
ಅಪ್ಪ ಅಮ್ಮ ಅಕ್ಕ ಅಣ್ಣ ತಮ್ಮ ತಂಗಿಯರ ನೆನಪುಗಳನು
ಬೆನ್ನ ಹಿಂದೆ ಚೂರಿ
ಹಾಕಿದವರ
ಮರೆಯಬೇಕಿದೆ
ನೇರ ನುಡಿಯಲು ಬಾರದ
ಭಿಕಾರಿ ಸಮಾಜವ
ಬದಲಿಸಬೇಕಿದೆ
ನೀ ತೊರೆದಮೇಲೆ
ಇನ್ನೂ ಪದಗಳ
ಹುಡುಕುತ್ತಿರುವೆ
ನನ್ನ ವಿರಹದಾಳ
ತೋಡಲು
-
ರಾತ್ರಿ ನಿಬೀಡತೆಯಲಿ
ಬಯಲಾಗಿದ್ದ ಬೆತ್ತಲೆಗಳು
ಇನ್ನೂ ಹಸಿರಾಗಿದೆ ಹುಡುಗಿ
-
ನಾ ಮನೆ ತೊರೆದೆ ,
ನೀನೂ
ಮನೆತೊರೆಯಬೇಕಿತ್ತೆ ಹುಡುಗಿ
ನನ್ನ ನೋವ
ಪಾಲು ಪಡೆಯಲು
-
ನಿನಗೇಳದೇ ಉಳಿದ
ಪ್ರೇಮ ನಿವೇದನೆಗಳಿಂದು
ಪದಗಳ ತುಂಬಿದ
ಕವನವಾಗಿದೆ ಹುಡುಗಿ
-
ನಿನ್ನ ನೋಡದಿರೆ ಹುಚ್ಚೇಳುತಿದ್ದ ಮನ
ನೀನಿರದೇ ಬಾಳುವುದ
ಕಲಿತಿದೆ ಹುಡುಗಿ,
ನಾ ಅದನೋಡಿ
ಕಲಿಯಬೇಕಿದೆ ಇನ್ನೂ
-
ಎಲ್ಲ ಕಳೆದುಕೊಂಡು
ಒಂಟಿ ಷರಾಬಿಯಾಗ
ಹೊರಟಾಗ
ಕೈಹಿಡಿದ ನೀನು ಯಾರೆ
ಸಹಯಾತ್ರಿ
---
ಚಿರ ವಿರಹಿನಾನು
ಪ್ರೇಮಿಗಳಷ್ಟೇ ಬದಲು
ಅಮ್ಮ
ಅಂಕಗಳು
ಆಟ
ಪ್ರಶಸ್ತಿಗಳು
ತಮ್ಮ
ಮನೆ
ಗೆಳೆಯರು
ಲಲನೆಯರು
ಕನಸುಗಳು
ಷರಾಬು
ಅಪ್ಪ
ಯಾರೂಯಾವುದೂ ಇಲ್ಲ
ಭ್ರಮೆ ಈ ಜೀವನ
ನಾ ಚಿರ ವಿರಹಿ
---
ನನಗೆ ನಾನೇ ಗೆಳೆಯ
ನನಗೆ ನಾನೇ ಇನಿಯ
ನನ್ನ ಮೀರುವಯತ್ನ
ಯುಗಗಳಿಂದ
ನಡೆದಿಹುದು
ಕೊನೆ ಇನ್ನೂ ಸಿಕ್ಕಿಲ್ಲ
---
ಬದುಕ ಖಾತರಿ
ವಿನೋದ
ವಿಲಾಸಗಳಿಗಿಂತ
ವಿರಹ
ನೋವುಗಳಲೇ ಹೆಚ್ಚು
----
ನಿನಗಿಲ್ಲವೆ ಕನಸುಗಳು
ಎಲರಂತೆ ಬದುಕಿನಾಸೆಗಳು
ಪ್ರೀತಿ ಗೆಳೆತನದ ಬೆಸುಗೆಗಳು
ಎಲ್ಲವಿಹುದಿಲ್ಲಿ
ಕನಸ ನನಸಾಗಿಸುವರು
ಆಸೆ ಈಡೇರಿಸುವರು
ಪ್ರೀತಿ ಮಾಡುವರು
ನಿನ್ನೆ ಶೂ ಪಾಲಿಷ್ ತಂದೆ
ಜೊತೆಗೆ ಸರಣಿ ನೆನಪು
----
ಕಂದು ಪಾಲೀಷ
ಕಪ್ಪುಶೂ ಗೆಹಚ್ಚಿದ್ದ ಕಂಡು
ಗೆಳತಿಗಾರತಿ ಎತ್ತಿದ್ದು
ಕೈ ಗಳಲ್ಲಿ ಕಂದುಬಣ್ಣವಿದ್ದರೂ
ಅದರಲೆ ಒರೆಸಿ ಕೊಂಡ ಕಣ್ಣೀರು ;
ನಿಷ್ಠೂರಿಯಾಗಿ
ನಾಹೊರಳಿ ತೆರಳಿದ್ದು
ನೆನೆದರೆ
ಇಂದು ಸೂಜಿಗವಾಗುವುದು.
------
ಹಾಸ್ಟೆಲ್ಲಿನಲಿ
ಗೆಳೆಯರೊಡಗೂಡಿ
ಮಾಡಿದ ಶೂ ಪಾಲೀಷು
ಇನ್ನೂ ಸ್ಮರಣೀಯ;
ರವಿವಾರದಂದು
ಎಲ್ಲರ ಶೂ ಗಳ ಒಟ್ಟು ಹಾಕಿ
ಆರೇಳು ಮಂದಿ ಒಗ್ಗೂಡಿ
ಯಾಮಾರಿಸಿತಂದ
ಯಾರದೋ
ಪಾಲೀಷು,
ಬ್ರಷ್
ಅನಾಥ ಬನಿಯನ್ನು
ಬೆಡ್ ಶೀಟು.
ಮಗ್ ನೊಳಗಿನ ನೀರಿನಿಂದ
ಹಳೆಯ ಪಾಲೀಷ
ತಿಕ್ಕಲೊಬ್ಬ
ಅದ ಒರೆಸಿ
ಬಿಸಿಲಲಿಡುವನೊಬ್ಬ
ಒಣಗಿದ ಶೂಗಳಿಗೆ
ಬನಿಯನ್ನಿನಲಿ
ಪಾಲೀಷ ಹಚ್ಚಿ
ಅದು ಪೂರ ಶೂಗೆ
ಬ್ರಶ್ನಲ್ಲಿ ತಿಕ್ಕಿ
ಇಬ್ಬರು ಬೆಡ್ ಶೀಟ್ ಹಿಡಿದು
ಶೂ ಫಳಫಳಿಸುವವರೆಗೂ
ಉಜ್ಜಿಬಫಿಂಗ್
ಕೊನೆಗೆ
ಲೇಸ್ ಪೋಣಿಸುವವಗೆ
ಶೂ ರವಾನೆ
ಈ ಸಮಯದಲಿ
ನಮಗೊಬ್ಬ ಮಿತ್ರನಿಂದ
ಸಿಗರೇಟು ಸೇವೆ
ಕೊನೆಗೆ
ಕಾಲ್ಗೆ ಫಳಫಳಿಸುವ ಶೂ
---
ಸಮಯದ
ಮಾಲೀಷಿಗೆ
ಮರೆತುಹೋಗಿದ್ದ
ನೆನಪು ಗಳ
ಮತ್ತೆ ಪಾಲೀಷ ,
ನಿನ್ನೆ ಕೊಂಡ
ಕಪ್ಪು ಶೂ ಪಾಲಿಷ್
-ದೀಪಕ್
ನಾ ಬರೀ ಚಿತ್ರವಲ್ಲ ಅಣ್ಣ
ನೋಡ ಇರುವ ರಕ್ತ ಕೆಂಪು
ಎಳೆ ಎಳೆಗಳಾಗಿ
ಪದರದಿ
ಪದ ಜಾರಿಸುವ
ಸಮ್ಮೋಹಿತ ಕುಸುಮನಾ
ನಾ ಬರೀ ಚಿತ್ತಾರ ಅಲ್ಲವಣ್ಣ
ಪ್ರಿಯ ಪ್ರಿಯೆಯರ
ಆಲಿಂಗನದೂತನಾ
ಮಜ್ಜನದಿ ಪೂಸಿಕೊಳುವ
ಅತ್ತರಿನ ಧಾತುನಾ
ನಾ ಬರೀ ಚಿತ್ರಅಲ್ಲವಣ್ಣ
ಔಷಧದೊಳಗೂ ನುಸುಳಿಹ
ಮುಳ್ಳು ರಾಣಿ ನಾ
ನವಾಬ ಲಾಲರ
ಲಾಲನೆಯೊಳು ಬೆಳೆದ
ಗುಲಾಬಿ ನಾನು
ಒಳಗಣ್ಣೊಳು ಕಾಣು
ನಾ ಬರಿ ಚಿತ್ರ ಅಲ್ಲವಣ್ಣ
-ದೀಪಕ್
.
ಹೌದು,ನಾವೆಲ್ಲರೂ ಕಳ್ಳರು.
ಚಂದದ ಗೋಪುರಗಳ
ಕನಸಿನ ಅರಮನೆಗಳ ಕಟ್ಟಿ
ಭೃಮೆಯ ಭ್ರೂಣ ಬಿತ್ತಿ
ಪೆಡಂಭೂತಗಳ ಬೆಳೆಸುವವರು.
ಹಿತ್ತಾಳೆಯನೇ
ಬಂಗಾರದ ಬೊಗಣಿ ಎಂದು ನಂಬಿಸಿ
ವಾಸನೆಯ ಬಿರಿಯಾನಿ ಬಡಿಸುವವರು.
ಬೇಕು ಬೇಡಗಳ-ಸರಕುಗಳಿಂದ
ರಾಜಕೀಯ ಮಾಡುವ ದೇಶ ಭಕ್ತರು
ನಾವು.
ಮುಖನೋಡಿಯೇ
ಮಣೆಹಾಕುವ,
ತ್ರಿಕಾಲ ಜ್ಞಾನಿಗಳು ನಾವು.
ತತ್ವಗಳಿಲ್ಲದ ತತ್ವಜ್ಞಾನಿಗಳು ,
ಚದುರಂಗ ಪೈಲ್ ವಾನರರು!
ಮಣ್ಣೊಡನೆ ನೆಂಟ ಬೆಸೆದು
ಎಲ್ಲವನೂ ಮಣ್ಣು ಮಾಡುವ
ಸಮಾಧಿವೀರರು.
ಬಣ್ಣದ ಮಾತುಗಳ ಬಲೂನುಗಳನ್ನು
ಮಾರುತ,
ಕಣ್ಣಲ್ಲೇ ಎಲ್ಲ ಅಳೆಯುವ
ಮಹಾನ್ ಚತುರರು
ನಾವು ,
ನಿಮ್ಮ ಕಾಯುವ ಕುರುಬರು.
-ದೀಪಕ್’
ಇಲ್ಲದ ಬದುಕಲಿ
ನಾನೆಂಬುದನ ತೂರಿಸಿ
ಎಲ್ಲವ,ತುರಿದು
ಭುಜಿಸಿ
ಹೆಚ್ಚಿದಾಗ ಕಕ್ಕಿ
ಗಂಟಿಟ್ಟು
ಅಜೀರ್ಣತೆಯನೂ ಜೀರ್ಣಿಸಿಕೊಂಡು
ಉಣಲು
ಮಕ್ಕಳು ಮರಿಗಳಿಗೆ
ಹಳಸಿದನು ಉಳಿಸಿ,
ಆ ಮರಿ
ಥೂ ಎಂದುಗಿದು,
ಆಸ್ತಿಯ ಕರಗಿಸಿ
ತುಚ್ಛಿಸಿದಾಗ
ಸಮಾಧಿಯೊಳು ನನ್ನಸ್ಥಿ ಆಳಲಾಗದೆ ಇರಲಾರದೆ
ನಿರ್ಜಿವ
ನಿಮಿತ್ತವೀ ಬದುಕು
ಇಲ್ಯಾವ ಉದ್ದೇಶಗಳಿಲ್ಲ
ಕಾಲಾಹರಣ ,,,
ಮತ್ತೆ ಮಸಣ
ದೀಪಕ್
